• INICIU
  • //
  • EL FESTIVAL
  • //
  • PEP PALAU: "ASTURIES YE’L PARAíSU DE LOS QUESOS DE LA PENíNSULA IBéRICA"

Pep Palau: "Asturies ye’l paraísu de los quesos de la Península Ibérica"

‘CITA A CIEGAS’ CON PEP PALAU, DIRECTOR DE FÒRUM GASTRONÒMIC

GIJÓNSECOME. 03/10/2017

Pep Palau: "Asturies ye’l paraísu de los quesos de la Península Ibérica"

SI NOS ENTRUGAREN pol ingrediente secretu tres l’ésitu del eventu gastronómicu ensin el que nun s’entendiera la Historia de la cocina española d’anguaño, tendríamos que contestar, ensin duldar, Pep Palau. Dende la primer edición en 1999, el Fòrum Gastronòmic convirtióse nel festival gastro de referencia n’España. Con tres cites consolidaes -Barcelona, Girona, A Coruña- ye, amás, ún de los foros más influyentes del sector internacionalmente. Dende la solombra, esti gastrónomu catalán, gran espertu en quesos, vertebró ensin pedir protagonismu (xunto al so sociu, Jaume von Arend) la edá d’oru de la nueva gastronomía española, que’l so epicentru creativu -y tamién el so reináu- caltúvose constante en Cataluña nes últimes décades, dende El Bulli a El Celler Can Roca. Entusiasta, serenu y perfeccionista, pa Palau ye suficiente la satisfacción del trabayu bien fechu, siempre cola voluntá de dexar el mundiu meyor de lo que lu encontró. De momentu, espéranos nel prósimu Fòrum de Girona: 19, 20 y 21 de payares.

CUERPU

¿Dlgo qu’enxamás puea faltar na nevera de so casa?

Verdura.

Nuna cena con amistaes o familia, ¿quién igua la comida?

Préstame tar yo mesmu na cocina y compartir l’espaciu.

¿Cuál ye l’últimu productu que descubrió?

Una variedá de remolacha rosada, dulce y refrescante.

¿Cree que la sociedá sabe comer curioso, nel sentíu de saludable?

Vivimos nuna sociedá que vive la comida de manera dual. Hai una auténtica obsesión por comer saludablemente, esiste cada vuelta mayor información y ufierta y, al tiempu, invádenos la comida basura.

¿Cómo definiría usté la gastronomía asturiana?

Variedá por mor de la envidiable biodiversidá qu’ufre Asturies. Un territoriu gastronómicu onde alcontramos un escelente surtíu d’alimentos de mar y tierra. Una cocina mui rica y nutritiva. El paraísu de los quesos de la Península Ibérica.

ALMA

¿Cuál ye’l meyor encamientu gastronómicu que-y dieren na vida?

El de la predisposición a comer de too.

¿Qué rasgos de la so personalidá tán más presentes nos sos gustos gastronómicos?

L’arrogancia a la hora de xulgar a la persona que cocina, la coherencia, la sensibilidá.

¿P’hacia ónde s’empobina la gastronomía d’anguaño?

Los caminos son variaos. Pluralidá d’estilos col denominador común del compromisu col mundu y la sociedá. 

¿Con qué personalidá/celebridá del mundiu-y prestaría compartir una xinta?

Noam Chomsky.

¿Cuáles son les circunstancies más rares nes que cocinó o comió?

Hotel Resort gran lluxu en Túnez, nunes cocines baxo mínimos, ensin productos frescos y nin siquier cuchiellos pa trabayar. Paradoxes de la gastronomía.

MENTE

¿A usté conquístase-y pol estómagu?

Empecípiase perhí.

¿Cuál ye’l primer recuerdu gastronómicu que tien?

Dos, en cadena. Los golores fondos del obrador de la panadería de mio güelu: el de la masa madre, el del formientu y, por supuestu, el del pan recién sacáu del fornu, la nata de la lleche acabante catar y fervío, la rebanada de pan de miga.

¿En qué detalles se fixa cuando entra nun restaurante por primer vegada?

Na calidá humana y el saber facer profesional de la persona que m’acueye. Darréu d’ello na llimpieza y l’acústica del local.

¿Cómo-y esplicaría ustá la “alta cocina” a un rapacín/a?

Practicándola.

¿Un platu que lu obsesione y qu’entá nun prebara?

Apasióname’l universu de les plantes monteses.

BONUS TRACK

Una zuna personal…

La fruta n’ayunes.

Un deséu pal mundu….

La paz y l’alimentación saludable nun mundu más xustu y humanu.

Un viaxe pendiente…

A sitios onde se respire paz.

Una fras célebre o refrán del que s’alcuerde davezu…

“Dexái que los alimentos seyan la vuestra medicina”, Hipócrates.

Un encamientu pa la mocedá…

Que daprendan a cocinar y a comer. Y que valoren siempre l’esfuerciu y la sabiduría de quien cultivó o crió los alimentos que tresformamos.

ENTRUGA A CIEGUES

La selmana pasada, Susi Díaz dexónos pa usté pa la entruga que sigue: “¿Si fores un ingrediente cuál sedríes? ¿Y yo?

Pan. Arroz.

Por favor, una entruga pal siguiente invitáu/a:

¿Cuál ye’l alimentu que más valores?

NEL PRÓSIMU CAPÍTULU CITA A CIEGUES CON FERRAN ADRIÀ

© GSC

mg.lab 2017