ENTAMÓ A TRABAYAR na hostelería a los venti años por dos motivos: echar un gabitu na economía familiar y porque’l sector nun yera del tou desconocíu pa la so familia, pues los güelos rexentaren munchos años un popular llocal de la cai Covadonga de Xixón llamáu Casa Pepín. Estrenóse nel llocal d’un amigu de la familia, el Café Caracol, en Xixón. Depués d'añu y mediu ellí, abrió, xunto col hermanu’l so propiu llocal: El Palacio, un pequeñu chigre familiar na plaza del Marqués, nel cascu vieyu de Xixón. Fueron años de munchu ésitu y bonos tiempos, asina que, namái tres años depués, nel 2000 yá taben abriendo’l restorán, na primer planta, con aforu pa cincuenta comensales. En 2006 abrieron una pequeña cervecería frente a El Palacio. Teníen seis grifos de cerveza, más de trenta variedaes de cerveza embotellao y poníen copes les nueches del fin de selmana. En 2009, ampliaron El Palacio: añadieron otru salón más al restorán y una zona nueva al chigre. Esta zona resultó, a posteriori, mui importante, pues ehí entamaron a ellaborar cócteles y Gin Tonics especiales. Aquella zona significó la so entrada “seria” nel mundu de la coctelería. Ellí entamaron a dar a conocer el so trabayu colos destilaos mientres lo compaxinaben con diferentes formaciones y cursos. En 2011 vieno’l gran saltu. Alcontraron la oportunidá de reflotar un llocal únicu, el Varsovia, que fuera un referente na nueche xixonesa nos años 90. Nel Varsovia, centraos nes copes y na coctelería, empezaron a ser visibles dientro del mapa nacional y el so trabayu permíte-yos llegar a cursos, eventos y formaciones de primer nivel: salón Gourmet, London Cock- tail Week..., cursos de formación en Madrid, Barcelona, Ibiza… Too xunto a los meyores barmans nacionales. Ye nesi añu cuando anicien el so camín nes competiciones de coctelería y de Gin Tonics y collechen dalgunos ésitos. Cuasi al empar anicien la so actividá n’eventos, ocupándose del serviciu de coctelería y barres llibres n’eventos de toa triba. Gracies a esta actividá, pudieron trabayar con chefs y restoranes de primer nivel, como Pedro y Marcos Morán, de Casa Gerado o Nacho Manzano de Casa Marcial. Tala ye la collaboración colos Morán, que-yos confíen toles barres llibres y de coctelería n’esclusiva cuando faen eventos fuera del so restorán. Tamién tienen el privilexu de trabayar coles principales compañíes de destilaos: Diageo, Bacardi, Maxxium, Global Premium Brands, Zadibr, Pernord Ricard… De recién, remocicaron enforma'l restorán d’El Palacio. Asina naz, El Siete, un espaciu más actual, nel que se pueden picar unes tapes orixinales y ellaboraes, combinándoles con un cuidáu Gin Tonic o un cóctel. Anguaño’l so equipu ta presente nes principales competiciones de coctelería nacionales: World Class de Diageo y Legacy de Bacardi.
Más info
Mejor Bartender Español 2015.
Brand Ambassador de Schweppes.
Ganador español de la Diageo World Class Competition 2015.